رد قوي من مريم الخشت حول ضجة ظهورها بملامحها الطبيعية في مسلسل "طالع نازل"

النجمة المصرية مريم الخشت تصدرت الواجهة في الفترة الأخيرة بسبب التفاعل الكبير مع دورها في مسلسل "طالع نازل" مع النجمة منى زكي، وتصدرت مواقع التواصل بسبب التفاعل الكبير مع ظهورها ببشرة مجهدة وبملامحها الطبيعية في مشاهدها في المسلسل.

مريم الخشت تعلق على تعليقات أطباء حول بشرتها في "طالع نازل"

وخرجت النجمة المصرية مريم الخشت عن صمتها، بعد الجدل الكبير حول ظهورها في مسلسل "طالع نازل"، حيث لاقت إطلالتها في المسلسل تفاعل واسع من الجمهور، والتي امتدت إلى بعض الأطباء على السوشيال ميديا، والذين استخدموا صور مريم الخشت لدعوتها إلى الخضوع لإجراءات تجميلية، أو الحديث عن ظهورها ببشرة مجهدة أو بعيوب وشوائب، وردت مريم الخشت على هذا التفاعل خلال حديث لها مع برنامج "هنا القاهرة".

وذكرت مريم الخشت إنها تابعت هذه الضجة من أصدقائها، الذين أرسلوا إليها صور من دفاع الجمهور عنها، وقالت: "أنا أصلاً ما كنتش أعرف، أنا ما ببصش خالص وعلاقتي بالسوشيال ميديا ضيقة جداً، ما بشوفش حاجات بسهولة.. لقيت إنه في ناس بتبعت لي صور، وبيقعدوا بقى يقولوا لي: بصي الناس بتدافع عنك.. وأنا أصلاً مش عارفهم بيدافعوا عني ليه، مش فاهمة إن في مشكلة، ما أعرفش حاجة خالص!"

مريم الخشت تتحدث عن أصداء دورها في مسلسل "طالع نازل"

وأضافت مريم الخشت في تصريحاتها: "من كتر ما ابتدت تيجي لي حاجات وابتديت أقرأها فهمت بقى اللي حصل. ما اتضايقتش بصراحة شديدة، أولاً ما اتضايقتش لأني مش مؤمنة بالكلام، مش شايفه إن الكلام ده حقيقي ولا صح، ولا هي حاجة هزتني أنا شخصيا، لدرجة أن لما أسمع حد بيتكلم عليها تهزني أكثر.. هو الموضوع ما كانش في بالي خالص.. كون إن في دكاترة أو كده أخدوا صورة علشان يعملوا دعاية عليها، أنا حاسة إن ده شيء متوقع وطبيعي، مسلسل ناجح جداً جداً الحمد لله، ومن الطبيعي أن كل الناس بمختلف مجالاتهم يشوفوا طريقة.. يبقى المجال اللي هم فيه يلمس مع المسلسل ده بنجاحه بشكل ما علشان يستفيدوا من الكلام والترند على هذا المسلسل، عشان اللي هم بينزلوه يتشاف".

وعبرت مريم الخشت عن عدم انزعاجها من هذا الأمر، وقالت: "هو في الآخر الناس دي هم بيعملوا كده علشان عايزين يستفيدوا من شيء معين، وأنا الكلام ما ضايقنيش أنا شخصياً، لأنه سبحان الله يا ربي هو كان في كمية ناس بترد أصلاً كأني أختهم! الموضوع ده لمسني بشكل فظيع، لو حصل أي حاجه أنا اتبسطت جداً من كمية الناس اللي شافت أن الموضوع ده أكنه يخصهم هم وبيدافعوا كأني أنا فعلاَ من عيلتهم، دي حاجة كانت حلوة جداً".

وذكرت مريم الخشت في تصريحاتها أن البعض اعتاد على رؤية الفنانين على الشاشة بشكل مثالي للغاية، خاصة الذين يلجأون إلى الإجراءات التجميلية أو المكياج الرقمي، وأضافت: "دي اختيارات شخصية ومن حقهم وبتاعتهم وده طبيعي، لكن أنا مش الشخص ده وما بحبش الحاجات دي.. أنا واحدة بصور مسلسل صعب جداً، مجهد جداً، الميك آب اللي طول اليوم ده أصلاً بياذي البشرة بشكل فظيع، فلما يكون الواحد بينام قليل، بيشتغل كثير، وتحت ضغط، حاطة ميك آب طول اليوم.. لو بشرتي ما حصلش فيها مشاكل، يبقى أنا مش بني أدمة حقيقية، كدة أنا باربي! أكيد أنا باربي".

مريم الخشت تكشف خطوتها الجديدة بعد "طالع نازل"

واختتمت مريم الخشت حديثها بتصالحها مع شكلها الحالي، وقالت: "أصل أنا ما عنديش مشكلة، اللي عايز يعمل ده ده اختيار شخصي، ده شيء طبيعي ما فيهاش أي حاجة، بس هو الموضوع كمان إن هم ابتدوا يتكلموا إن أصلاً مش مقبول إن الممثلة جلدها يكون فيه أي مشاكل من أي نوع.. ليه؟ هي مش إنسانة؟" وكشفت مريم الخشت عن تعاقدها على مسلسل جديد مع الفنان يوسف الشريف في موسم رمضان المقبل، وقالت: "أنا متحمسة له جداً جداً بقى المسلسل ده، أولاً لأن أنا من فانز الاستاذ يوسف الشريف من زمان جداً جداً، فمبسوطة قوي إني هشتغل معاه، دي حاجه عندي حقيقي كبيرة".

وأضافت مريم الخشت في حديثها عن مسلسلها الجديد: "ما اشتغلتش مع الأستاذ أحمد نادر جلال قبل كده، فمتحمسة برضه للتجربة دي جداً، وهو شخص لما قابلته وقعدنا مع بعض فاهمين بعض جداً، ومتحمسة للموضوع نفسه بتاع المسلسل، الأستاذ عمرو سمير عاطف كتابته دايماً مبهرة.. دايماً مع بعض في مسلسل "الشرنقة"، كان من أحلى المسلسلات اشتغلت فيها والشخصية كانت مكتوبة حلو جداً وطلع منها حاجة حلوة جداً جداً.. متحمسة له جداً، لأنه كمان مختلف قوي عن أي حاجة عملتها قبل كده، أنا ما عملتش الشكل ده قبل كده، والشخصية نفسها مختلفة قوي عن أي حاجة قدمتها قبل كده برضه، فمتحمسة له جداً، وإن شاء الله بعد "طالع نازل" مختلف قوي برضه، ويا رب خير إن شاء الله".

الصور من حساب مريم الخشت على انستقرام.