تصريحات مؤثرة من أميرة أديب عن مواجهتها الإكتئاب وتأثرها بالتنمر والانتقادات

الفنانة الشابة أميرة أديب فتحت قلبها للجمهور مؤخراً، وتحدثت عن أزمتها النفسية معاناتها مع الاكتئاب، وذلك بعدما كشفت عن هذا الأمر لأول مرة عبر حسابها بانستقرام مؤخراً، قبل أن تكشف سبب حديثها عن هذا الأمر في أحدث لقاء إعلامي لها.

أميرة أديب تكشف تأثير الانتقادات والتنمر على صحتها النفسية

وكشفت أميرة أديب عدة أسرار جديدة عن معاناتها النفسية، ورحلتها في التعافي ومواجهة الانتقادات وحملات الكراهية والتنمر ضدها، وذلك خلال تصريحاتها الأخيرة في برنامج "On The Road"، وقالت في تصريحاتها: "على فكرة النقد ما كانش هو اللي بيزعجني... لما قلت على فكرة كان عندي اكتئاب وكده، الناس كانت فاكرة عشان أنا كنت بشتكي.. هو ما كانش عشان كده، هو كان حاجات كثيرة أوي.. كانت إن أنا كنت حاسة إني مكروهة أونلاين".

وتحدثت أميرة أديب عن تأثرها بحملات الكراهية على الانترنت وقالت: "بس النقد مش هو اللي بيضايقني... الفكرة إن ده شيء أصلاً هو اللي بيضايقني، إن في بني آدم عارف إنه يطلع كراهية من جواه.. إن الناس مكبوتة لهذه الدرجة لدرجة إنها بتستفز من حد بيعمل شيء هو بيحبه... الفكرة إن في كره لهذه الدرجة في المطلق وإن ده بقى العادي، ده اللي كان مؤثر عليا أوي".

تصريحات مؤثرة من أميرة أديب عن معاناتها مع الاكتئاب

وكشفت أميرة أديب عن تأثير هذه الانتقادات على صحتها النفسية، بالإضافة إلى تأثرها بقصة حب فاشلة، وقالت: "كان في فترة في حياتي مريت بكذا حاجة وقعتني... كان درس ورا درس ورا درس... كنت بتعب أوي عشان أقدم شيء، فأقدم الشيء فألاقي ناس بتشتمني.. وبرضه كنت في علاقة ما كانتش أحلى علاقة، فكان محسسني إن أنا مش كويسة، فمع الناس اللي بتكرهني دي صدقت إن أنا بني آدمة مش كويسة.. أنا بني آدمة، متضايقة إن أنا بس نفسي والناس مش حاباني، متضايقة اكيد... أنا بعمل إيه؟ أنا ما بعملش حاجة.. أنا أحاول أقدم شيء يخلي الناس تبتسم وتحب نفسها".

وتحدثت أميرة أديب عن سبب حديثها علناً عن الاكتئاب، وقالت: "لما أنا طلعت أتكلم عن الاكتئاب.. أنا بس طلعت أتكلم مش عشان أستعطف الناس ولا عشان أي حاجة، عشان بجد هي دي الحقيقة وأنا ما بخافش من الحقيقة... وكنت حابة أقول أنا راجعة تاني، وأنا كنت مكتئبة في فترة ما، وعادي إن البني آدم يبقى مكتئب، لو حد حاسس بالإحساس ده.. كان نفسي وأنا مكتئبة أتفرج على حد يقول إنه طلع منها.. كنت عايزة الأمل ده، وكنت عايزة أكون حقيقية مش قصدي استعطاف، عشان كان في فترة كنت مش بقبل شغل وقافلة على نفسي.. كنت عايزة أقول إن أنا لا، أنا تمام... أنا إنسانة جيدة".

وانتقلت أميرة أديب بعد ذلك إلى الحديث عن تأثير اضطراب فرط الحركة وتشتت الانتباه (ADHD) عليها، وقالت: "على فكرة الـ ADHD بيسهل أوي موضوع الاكتئاب ده، بيسهله أوي.. الـ ADHD فيه نقص في الدوبامين، جزء منه كبير إن مخك ما بيفرزش دوبامين، فلما الاكتئاب بيخبط كده، الاتنين مع بعض... الاكتئاب صفر دوبامين، مع الدوبامين اللي ناقصني أساساً.. وقع كفاني على الأرض"، وكشفت أيضاً عن تأثرها بالحروب والانتقادات داخل الوسط الفني، وتعرضها للتنمر أيضاً بسبب شكلها.

أميرة أديب تكشف كواليس دخولها المجال الفني

وقالت أميرة أديب عن تأثرها بالانتقادات والتنمر بعد دخولها المجال الفني، وقالت: "الشغلانة بالنسبة لي برضه كانت مأثرة عليا.. كان إن أنا بسمع كتير لازم تعملي مناخيرك، لازم مش عارف إيه.. الدور ده مش هنديهولك عشان شايفين لو حطيتي فيلر هناخدك... وكانوا يقولوا لك لازم تبقي أنانية عشان توصلي، وكنت بسمع حاجات عكس تماماً تربيتي وفطرتي، وأكيد كنت بتأثر بيها ومش واخدة بالين أنا جاية يا جدعان أمثل وأرقص وألعب، ليه فيه الكره ده؟ وشايفة ناس بتدوس على ناس عشان توصل، وشايفة جشع وحرمان، لما لقيت إن أنا عشان أوصل لازم أبقى أنا، كرهت الشغل، لحد ما عرفت إزاي أبقى أنا، ولو ما وصلتش للي أنا عايزاه... أكون ببني آدميتي من غير ما أي حد يحس إنه متهان مني".

وتحدثت أميرة أديب عن الدروس التي استفادت بها من خلال تجربتها ومعاناتها النفسية، وقالت: "طلعنا بحاجات كتيرة أوي.. مبدئياً أهم حاجة طلعنا، وطلعنا بإن دلوقتي حاسة لو وقعت الوقعة دي تاني هعرف إن فيها مخرج، أنا في فترة ما كنتش عارفة إن فيها مخرج.. عادي إنك تاخد مهدئات وأدوية، وعادي إنك تعمل أي حاجة هتطلعك من الحفرة اللي انت فيها، وعادي إنك تتكل على الناس... وإن الصحاب مهمين جداً جداً وفي الوقت ده بيبان مين بيحبك بجد ومين لا، أهم حاجة اتأكدت لي إن أنا هفضل زي ما أنا، ومش لازم أتغير عشان حد، واللي حاببني كده يحبني كده، واللي مش حاببني مش مهم نهائي... المهم إن أنا أبقى حقيقية مع نفسي".

الصور من حساب أميرة أديب على انستقرام.