يسرا تسترجع محطات حياتها في تصريحات مؤثرة.. "عن عدم الإنجاب وشائعات مرضها بالزهايمر"

النجمة المصرية يسرا فتحت قلبها للجمهور، واسترجعت فصول ومحطات من حياتها ومسيرتها، وكشفت الجانب الآخر منها، خلال أحدث لقاء إعلامي لها، والذي أطلقت به العديد من التصريحات المؤثرة عن حياتها ووالدتها الراحلة وعدم إنجابها وغيرها من المواقف الهامة بحياتها.

يسرا تتحدث عن قرار عدم الإنجاب وتساند نجلاء فتحي

وحلت النجمة المصرية يسرا ضيفة على برنامج "الصورة" مع الإعلامية لميس الحديدي، وكشفت في البرنامج العديد من الأسرار الجديدة عنها، ومنها حديثها عن تجربة زواجها الأولى التي انتهت بالطلاق، وقالت عن سر انفصالها وقتها: "ده كان قرار وأنا واخداه وأنا مقتنعة تماماً إن أنا صح، و ويعني عرفت بعد كده ان انا كنت صح.. بس الست لازم تبقى عارفة امتى تقول لا، هو ده المهم".

وكشفت يسرا عن رؤيتها لذلك الموقف في حياتها وقالت: "الست ممكن متقولش لا طول عمرها، بس تيجي في لحظة لازم تقول لا لما حقها يُهدر تماماً، لما تحس إن هو واخدها أمر مفروغ منه.. وفي ستات نكدية كمان، لا أنا مش معاهم دول خالص، الستات الحقانية اللي فاهمة امتى تطلب حقها صح، هو ده اللي أنا معاهم…"، وأضافت يسرا في تصريحاتها: "قرار الانفصال الأولاني في زواجي الأولاني كان قرار وأنا واخداه وأنا مقتنعة تماماً إن أنا صح، وعرفت بعد كده إن أنا كنت صح، يعني ما أخدتش القرار الغلط خالص".

يسرا تسترجع فصول ومواقف مؤثرة من حياتها

وقالت الفنانة يسرا في تصريحاتها عن قرارها بعدم الإنجاب: "مفيش ست ما نفسهاش، بس مش معناها إن أنا أتعس الأطفال إن أنا هجيبهم علشان لازم اجيب أطفال، كمية الستات اللي على طول قاعدين يخلفوا لا عارفة تربي ولا عارفة تعلم.. أنا كنت متجوزة في الأول علشان أنا كنت عايزة أخلف، وفعلاً حملت مرة أو مرتين وما حصلش نصيب إن الطفل قعد، خلاص انت ما بتعانديش مع ربنا، في حاجات كده بتاعة ربنا لازم تبقي عارفة إنها بتاعة ربنا، ولازم تقبلي بيها والرضا، ولو إنك لو مقبلتيهاش ولا مرضيتيش هتعملي إيه؟ هتغيري حاجة؟ انت اللي هتتعبي، فبتسلمي أمرك لله مافيش غيره..".

وكشفت يسرا عن شعورها بالرضا حالياً من قرار عدم الإنجاب، وتذكرت بسبب ذلك الألم الذي تعيشه صديقتها نجلاء فتحي بعد وفاة ابنتها "ياسمين" مؤخراً، وقالت: "أنا النهاردة بقول يا خبر الحمد لله إن أنا بجد ما خلفتش، الحمد لله علشان الحياة دلوقتي مش زي الحياة زمان، الظروف دلوقتي مش زي الظروف زمان، القهرة بتاعة دلوقتي بقت صعبة أوي أوي.. يعني إني أسمع مثلاً حد من أصحابي مثلاً نجلاء فتحي، ده لو تعرفي ده أنا خايفة عليها قد إيه، قاطع في قلبي قد إيه، بنتها مولودة على إيدي، يعني أول عملية ليها أنا كنت معاها ومع نجلاء وكنا في مستشفى في إسكندرية أنا فاكرة".

وكشفت يسرا عن عدم استطاعتها زيارة نجلاء فتحي إلى الآن، خاصة أنها غابت عن جنازة ابنتها بسبب تواجدها خارج مصر، وقالت: "البنت كانت راضية بكل اللي ربنا كتبهولها، أنا مقهورة قهرة ما حدش يتصورها بجد، بفكر في نجلاء طول الوقت وخايفة عليها جداً.. وللأسف أنا ما كنتش في مصر عشان اعرف أعزيها ومش عارفة أروح لها لأنها رافضة تشوف أي حد، لكن ياسمين ملاك مش بشر، وقهرة زي دي أنا ما كنتش هستحملها".

يسرا تتذكر والدتها الراحلة وتعلق على شائعات مرضها

وتحدثت يسرا عن الشائعات التي تلاحقها في الفترة الأخيرة من حياتها، وقالت ساخرة إنها تتعرض لشائعة جديدة كل 5 دقائق، ومن أغرب الشائعات التي واجهتها مؤخراً، شائعة إصابتها بمرض ألزهايمر والحجر على أموالها بسبب ذلك، بالإضافة إلى شائعة زواجها 16 مرة من قبل، واعتبرتها شائعة مضحكة للغاية، كما تحدثت بتأثر عن والدتها الراحلة، وقالت إن والدتها هي من شكلت حياتها وأكثر من أثر بها، وقالت إنها حتى الآن لا تستوعب رحيلها، رغم مرور 7 سنوات على وفاتها، لدرجة أنها تركت جميع متعلقاتها وسريرها وكل شيء يخصها كما هو في المنزل، لأنها لا تستطيع تقبل رحيلها عنها.

وتغزلت يسرا أيضاً في اللقاء بزوجها خالد سليم ودوره في حياتها، وقالت إنه صديقها منذ أن كانت في السابعة من عمرها، وقالت عن حياتها معه: "وجوده في حياتي ظبط حياتي، يعني في إنسان متفهم، عارف يحبك صح، يعني يقرب منك امتى، يبعد عنك امتى، يستحمل ظروفك إزاي، يبقى صامت امتى معاك، يعمل إيه ليكي امتى، برضه هو مابيعرفش يتكلم كتير، وساكت، هو من النوع اللي مابيحبش الدوشة والخروج والكلام ده، لكن هو راجل نضيف،  فأنا ربنا إداني حد نضيف في حياتي بجد بجد، نعمة كبيرة جداً جداً ربنا يديمه عليا، وخالد بالنسبة لي مش زوج بس.. صاحبي وصديقي، وبمارس كل المعاني من خلاله".

الصور من حساب يسرا على انستقرام.