عن خضوعها للتجميل وعدم الإنجاب.. سلوى خطاب تفتح قلبها للجمهور بأسرار عن حياتها ومسيرتها

الفنانة سلوى خطاب تصدرت الواجهة مؤخراً، بعد تصريحاتها الأخيرة التي كشفت بها العديد من الأسرار الجديدة عن حياتها ومسيرتها، وفتحت قلبها للجمهور مسترجعة ذكرياتها، وتحدثت عن سبب عدم إنجابها وكذلك عن خضوعها للتجميل.

سلوى خطاب تكشف عن الإجراءات التجميلية التي خضعت لها

وتحدثت الفنانة سلوى خطاب بصراحة وجرأة عن تجربتها الأخيرة مع عمليات التجميل والنضارة، خلال لقائها في برنامج "كلمة أخيرة"، مع الإعلامية لميس الحديدي، وأشارت إلى أنها كانت متخوفة للغاية في البداية لحرصها على عدم تغيير ملامح وجهها الأصلية، ولكنها وثقت بالطبيب الذي حافظ على شكلها الطبيعي، وذكرت إنها لم تتوقع أبدأ أن تخضع لعملية تجميل، ولم تفكر في ذلك من قبل، وقالت: "الحمد لله عمري ما بصيت لشكل، عمري ما أخدت بالي إن أنا أعتمد على إنه لازم".

وأضافت سلوى خطاب في تصريحاتها: " طبعاً للدور واحب أطلع للناس بشكل متوضب ولطيف، لأنه أنا رأيي حتى لو بتقدمي واقع ما أنتِ لازم تحطي فيه لمحة فنية من أول الشكل..فكان عندي مشكلة في وشي مضايقاني، قالوا لي ضحكوا علينا وقالوا لي بتاع النضارة.. المهم كل الستات بتروح طب ما أروح أنا.. أنا مش من النوع اللي ببص لنفسي كتير قوي في المراية."

سلوى خطاب تفتح قلبها للجمهور بتصريحات نادرة عن حياتها

وتحدثت سلوى خطاب عن تخوفها من التغييرات في شكلها، وقالت: "طول الوقت كنت قلقانة أقول إيه: طب أنا ربنا ساترني وشكلي مقبول لحد دلوقتي ولسه ما عنديش حاجات يعني، وأنا بيهمني قوي القبول عند الناس، طبعاً دي فيها روح وفيها إحساس وفيها أكتر من الشكل، أقول طيب ربنا ساترني أنا ليه هبقى طماعة أروح أعمل حاجة ربنا يقولي لا، خايفة شكلك يتغير وشك يبقى شكل تاني، لحد ما لقيت الدكتور اللي أنا بدور عليه، فتابعته وشوفت شغله وشوفت شغل لبعض زمايلي وعجبني قوي إنه بيحافظ على شكل الوش.. قلت له أنا عايزة أشوف سلوى، مش عايزة أشوف حد تاني."

وقالت سلوى خطاب مازحة حول تصالحها مع العمر والتجاعيد: "والله ما حصلتليش تجاعيد لدرجة إن أنا أحبها يعني، قبل ما أحب تجاعيدي كنت عملت.. أنا قصة حب تجاعيدك دي مش عارفاها، طب أحبها ليه يعني؟ ماشي أشيلها أحسن"، وتحدثت بعد ذلك سلوى خطاب عن حياتها العائلية والزوجية، وتذكرت قصة زواجها من المخرج أسامة فوزي، وقالت: "إحنا قصة 15 سنة.. متجوزين خمس سنين.. بصي الحاجات اللي ما أنساهاش لأسامة الله يرحمه، ما بقدرش أقول الله يرحمه، ما بعرفش أقولها تحسي إنه موجود.. إحنا عندنا تضارب أفكار لما يبقى اتنين فنانين عايشين مع بعض وهو ليه خصوصية جامدة في التعامل، يمكن أنا كمان وقتها ما عنديش قدرة على التحمل لأني كنت تحملت كتير قوي..".

وتابعت في تصريحاتها عنه: "الحقيقة عايزة أقولك إن أسامة كان اختياري.. طول عمري كنت أقول لا أنا مش عايزة أعيش قصة حب عادية وأتجوز، أنا عايزة حاجة فيها تشويق كده، ودخلت كل التشويق"، أما عن سبب عدم استمرار زواجمهما لأكثر من 5 سنوات، فقالت: ""بيبقى أقدار.. مش معنى ذلك إن.. أنا نزلت لغاية النهاردة مؤمنة إن هو بني آدم محترم جداً على المستوى الفني وعلى المستوى الإنساني.. في مميزات أنا ما شوفتهاش في حد.. لما انفصلنا بقيت أقول لصاحبتي: صدقوا طلقني! قعدت أزن بقى فطلقني، طلقني أنت ما بتطلقنيش ليه؟ وكل يوم بعد ما طلقتني أقول: الله طب ما أنا اللي طالبه".

تصريحات مؤثرة من سلوى خطاب عن عدم إنجابها

وتحدثت بعد ذلك سلوى خطاب عن عدم إنجابها، وقالت: "المثال إن الجواز بيبقى برضه مهم إنك عشان تخلفي وتعملي أسر وتعملي بتاع.. فلما الراجل اللي أنا حبيته وما حصلش نصيب إن يبقى فيه، خلاص.. كان نفسي الحكاية تنتج يعني.. لو تسأليني بصدق، أنا كنت خايفة من حكاية الخلفه دي، بخاف من المجتمع وإنه بتبقى مسؤولية إن مابقاش قدها، لازم أتفرغ لهم.. طب أنا اتفرغت للجواز واتفرغ للعيال طب ما أعتزل بقى وأقعد.. لأنها مسؤولية ما كنتش هربي أحسن تربية".

وأضافت سلوى خطاب في تصريحاتها: "لما كنت بشوف المجتمع حواليا.. هجيب عيال هيعيشوا إزاي بوجهة نظري؟ ودي مسؤولية الست بس.. الراجل بيخلع تماماً وهي بتبقى مسؤولية الست حتى لو موجود، أنتِ بتبقي الأم.. وأنا ما بعرفش أعمل حاجة نص ونص، لازم أستغرق"، وشوقت سلوى خطاب الجمهور لمشاركتها في الجزء الثاني من مسلسل "نيللي وشريهان"، وقالت أنها بشكل عام لا تفضل فكرة تقديم أجزاء ثانية إلا إذا كان هناك نص قوي يستحق ذلك تقديم شيء أفضل، وأكدت أنه جرت مناقشات ومحادثات مع المخرج أحمد الجندي والمنتج أحمد السبكي ودنيا وإيمي سمير غانم حول تقديم جزء ثاني، ولكن الأمر يرجع لقوة الكتابة وجودة النص قبل اتخاذ القرار النهائي.

الصور من حساب سلوى خطاب على انستقرام.