حديث مؤثر من درة عن حلم الأمومة ووالدها الراحل.. وماذا كشفت عن دور زوجها في حياتها؟
النجمة التونسية درة تصدرت الواجهة مؤخراً بعد تصريحاتها الأخيرة التي كشفت من خلالها عن العديد من الأسرار الجديدة حول حياتها الخاصة والفنية، وكذلك تحدثت عن الأحلام التي تتمنى تحقيقها في حياتها، وعلى رأسها حلم الأمومة.
درة تكشف دور زوجها هاني سعد في حياتها
وكشفت النجمة التونسية درة عن أسرار جديدة عن حياتها خلال تصريحاتها الأخيرة في برنامج "الصورة" مع الإعلامية لميس الحديدي، وكشفت في تصريحاتها عن رفضها أن تعيش في دور الضحية في حياتها بالنسبة إلى ظروفها، وذلك لأن شعور الضحية يجعلها تشعر بالعجز، وكذلك لا تحب الشكوى، وهو ما جعلها تتحدث عن دور زوجها هاني سعد في حياتها وعن مساندته لها.
وقالت درة عن دور زوجها في حياتها: "هاني اللي فيه مكفيه بصراحة، هو ديزاينر معروف جداً ومهم جداً، هو طبعاً بصراحة مشغول أوي في شغله كمان، وعنده كمان مشاكله.. ولا أحاول تحميله فوق طاقته.. بس هو السند أكيد، وزي ما يعني أنا وهو لازم نكون سند لبعض، ولازم الجواز نفسه هو حاجة مش سهلة، بيكون فيها أوقات سعيدة وأوقات صعبة لازم نعديها مع بعض، ولازم نحاول نبقى مع بعض مش ضد بعض يعني، بنضعف أحياناً وبنقوى أحياناً، وأحياناً بنقوي بعض أو حد يقوي التاني يعني.. ده لازم وده بيحصل".
حديث مؤثر من الفنانة درة عن حلم الأمومة
وردت درة على سؤال لميس الحديدي حول الشيء الذي ينقصها في حياتها، وقالت: "أكيد في حاجات ناقصة، هو الناس لازم تبقى بالعكس بتشوف ايه الصورة دي، لكن لازم نبقى حنينين كده على بعض، لازم يبقى في تقدير، لأنه الشخص حتى اللي بتشوفه في الصورة دي هو أكيد شايل جواه حاجات محدش عارفها، في حاجات بتألمه، في عنده أوقات صعبة بيمر بيها.. حاجات كتير.. أنا كشخصياً يعنيـ في حاجات زي ما الحمد لله ربنا أداني حاجات، في حاجات مش عندي.. بفتقدها. طبيعي يعني ده بيكون أحياناً مؤلم، الواحد مش بيعرف يحقق كل أحلامه، يعني بتبقى عندك أحلام وبتحققي بعضها وبعضها لأ".
وقالت الفنانة درة عن الحلم الذي ترغب في أن تحققه وهو حلم الأمومة، وتحدثت بتأثر عن ذلك وقالت: "كان نفسي أبقى أم مثلاً.. "، ولم تستطع استكمال حديثها عن الأمر، وطلبت من الإعلامية لميس الحديدي تغيير السؤال والانتقال إلى موضوع آخر بعد تأثرها، وتمنت لها لميس الحديدي تحقيق هذا الحلم، وأخبرتها أنه مازال أمامها المزيد من الوقت لتحقيقه، وانتقلت بعد ذلك إلى الحديث عن حياتها العائلية، وعلاقتها بوالديها، وتذكرت الأيام الأخيرة في حياة والدها.
وذكرت الفنانة درة أن والدها أصبح قريباً منها للغاية في أيامه الأخيرة، وقالت: "والدي لما توفى دي كانت أزمة بالنسبة لي، أكيد وما زالت يعني.. أنا بفتقده دايماً، مش بنساه وبفتقده دايماً، وبفتقده يمكن بالنسبة لي أنا.. بس أنا في حالتي أنا يمكن ما عشتش معاه طول الوقت، ما عشتش معاه كتير لأن أنا أبويا وأمي منفصلين وأنا صغيرة بس كنت بشوفه وكل حاجة.. وابويا كان شخصيته شويه صعبة يعني، في فترات كنا بعاد عن بعض، وبعدين أنا جيت عشت في مصر كمان وكان في شوية فجوة ما.. مكناش بنتكلم، في آخر أيامه وهو الله يرحمه يعني لما جاله كمان المرض اللي جاله، هو بدأ يقرب مني أكتر ومننا".
درة تتذكر الأيام الأخيرة في حياة والدها
وأضافت درة في تصريحاتها عن والدها الراحل: "بدأ يبين حنيته أكتر ويبين مشاعرهـ يعني هو ماكانش بيقول مشاعره، مكانش بيعبر أوي، فلما بدأ يقول بجد ويبعت لي ويقول لي إنه بيحبني وإن هو فخور بيا.. فأنا كنت نفسي الفترة دي تطول، إن أنا هقرب منه أوي، أبقى عايزه رأيه في حاجات"، وتحدثت بعد ذلك عن والدتها وعلاقتها بها وقالت: "أمي كانت ملهمة طبعاً، أمي ملهمة لأن أمي شخص يعني اتحمل وهي اعتمدت على نفسها كتير، اعتمدت على نفسها فترة طويلة من الحياة، كانت بتربينا شبه لوحدها، كانت بتشتغل شغل كمان محققة نفسها، يعني كانت بتحاول تتحمل كل هذه المسؤوليات وهي فقدت أبوها وهي صغيرة برضه، يعني أنا فقدته وأنا كبيرة بس هي عاشت واعتمدت على نفسها كتير يعني".
وتذكرت درة بداياتها الفنية وقالت إنها كانت تحب العمل في سن صغيرة، وبدأت العمل في المسرح وكانت تحصل على أجر صغير، وذلك في مرحلة الجامعة، وكانت تشعر بالسعادة، وقالت: "طول عمري حتى وأنا صغيرة عندي شخصيتي المستقلة كده. عندي أصحابي، عندي العالم بتاعي، بقعد كتير أعيش في الخيال، أتفرج على حاجات.. حبيت الفن برضه من بدري"، وتحدثت درة عن عدة جوانب أخرى في حياتها وشخصيتها، وقالت إنها تشعر أنها أصبحت شخصية حساسة في الفترة الأخيرة من حياتها، وقالت: "أنا نفسي برضه الناس برضه تعرف إن إحنا بشر، الناس دلوقتي عشان العالم بتاعنا بقى صعب والسوشيال ميديا بقت صعبة وبقى في كده أذى للأذى، بقى في ساعات كلمة.. الكلمة دي على فكرة بتجرح".
الصور من حساب درة على انستقرام.
