أنغام تبكي في أول رسالة صوتية لها بعد محنة المرض: "كان كل خوفي أسيب ولادي"
النجمة المصرية أنغام باتت حديث الجمهور خلال الساعات القليلة الماضية بعد أن قررت الخروج عن صمتها وتوجيه رسالة للجمهور بعد عودتها إلى مصر بعد رحلة علاج أقلقت فيها الجمهور على حالتها الصحية، ونشرت أنغام عبر حساباتها على مواقع التواصل الاجتماعي رسالة صوتية لجمهورها وجهت من خلالها الشكر لهم على وقوفهم بجانبها في أزمتها الصحية ودعائهم المتواصل لها.
أول رسالة صوتية للنجمة أنغام بعد أزمتها الصحية
وقالت أنغام في رسالتها: "صباح الخير.. أنا فكرت أكتب ولا أتكلم بصوتي، وحسيت إنه محتاجة أتكلم معاكم بصوتي، وأقول لكم، لكل حد وقف جانبي ودعالي من قلبه وكل شخص اكتشف أنه بيحبني، أو حتى مكنش بيحبني وقرر بإنسانيته وحنيه وقلبه أنه يدعيلي ويدعمني في المحنة اللي عديت بيها، بشكركم من كل قلبي".
ولم تتمالك أنغام دموعها وأضافت وهي تبكي: "أنتم دعيتم وربنا استجاب، ودعائكم كان هو الدواء وهو الإيد اللي بتطبطب وهو الحنية وهو اللي وقفني على رجلي بعد ربنا وبعد الدكاترة، مش عارفة أقول ايه ومش عارفة اتكلم ومش عارفة ما ابكيش من فرحتي والامتنان والشكر لله ولكم، اللي مالي قلبي دلوقتي وموقفني على رجلي أنكم دعيتم لأنغام من قلوبكم، وكمان دعيتم لأم اتمنت من ربنا إنها تكمل كمان شوية عشان تكمل الحياة مع أولادها وتفرح بهم وترجع تعيش وسطهم تاني"
أنغام تكشف مخاوفها خلال فترة المرض
وتابعت أنغام: "أنا كان كل خوفي إني أسيب ولادي، مكنتش عايزة حاجة خالص من الدنيا غير إني بدعي من ربنا إني ارجع لولادي.. نفسي أكمل مع ولادي وارجع أعيش وسطهم تاني.. أنا عديت بمحنة صعبة جدًا عليا وشديدة جدًا بس شكرًا لله اللي حط في قلوبكم كلكم زملائي وأصحابي وأصدقائي وأخواتي ومحبين بيحبوني لله وجمهور بيحب أنغام اللي بتغني جمهور كبير قوي وعظيم قوي ونادر الوجود ونادر ما يكون في قلوب بالجمال دا والصدق دا والحنية دي، وأنا عمري يمكن ما كنت بالضعف دا قبل كدة، بس أنا مش خجلانة أبدا إني أكون ضعيفة قدامكم شوية لإني بقيت حاسة إن أنا حتة منكم وإن أنتم أهلي ومش غلط أبدا ولا عيب إن الإنسان يضعف قدام أهله ويطلب منهم إن هما يستحملوه في وقت ضعفه وانتم استحملتوني أوي ووقفتوني على رجلي بجد بالدعا وبالمحبة اللي وصلتني على سريري في المستشفى وكل ما كنت بفتح عيني وبقرأ كلامكم أو يوصلني بأي شكل من الأشكال وحبكم ودعائكم وأمنياتكم والكلام الحلو الداعم جدا الحنين جدا اللي كان بيطبطب علي كنت بصر إن أنا أفضل مفتحة عينيا ودا كان أكلي وشربي ودوايا الحقيقي".
واستطردت النجمة المصرية في رسالتها: "مش هقدر أقفل الرسالة دي قبل ما أشكر الأستاذ الدكتور البروفيسور أيمن أغا العربي الفلسطيني اللي أجرى العملية اللي كان بعد ايد ربنا ايده هي سبب شفايا وأشكر أستاذ دكتور محمود نجيدة الدكتور المصري أخويا الرائع اللي ربنا من عليا بوجوده اللي كان متابع حالتي من البداية في مصر وأنا في ألمانيا كان طول الوقت بيتابع حالتي مع دكتور أيمن ثانية بثانية ولحظة بلحظة، وأي حد ساعدني، وأي حد طبطب عليا أي حد حرك السرير حتى بشكره، وأشكر ولادي عمر وعبد الرحمن وبشكر أمي على دعائها ليا وأصحابي وأخواتي راندا ويمنى وعادل وكل أصحابي اللي كانوا بيدعوا لي".
أنغام توجه الشكر للجمهور
واختتمت أنغام رسالتها قائلة: "عندي كلام كتير اوي اوي عايزة أقوله ومش عارفة أقوله أوي بس أكيد أنتم حاسين وفاهمين ومشتاقة جدا جدا اني اشوفكم قريب على المسرح نتقابل ونغني ونحتفل وربنا يجعل أيامكم دايما بركة وصحة وخير، ومتشكرة جدا من كل قلبي مليون شكر وحمد على وجودكم ونعمة حبكم ونعمة دعاءكم ونعمة الصدق اللي خرج من قلوبكم ووصلني ودفاني وغطاني وداواني وكل حاجة ممكن تتخيلوها أو ماتقدروش تتخيلوها أنتم كنت سبب فيها وسبب كبير في وقفتي على رجلي ووجودي وسط ولادي وعيلتي وأهلي، الحمدلله على اللطف الكبير من ربنا اللطيف اللي لطف بيا وقلوبكم اللطيفة اللي لطفت بيا كمان، شكر شكر ألف شكر".
الجدير بالذكر أن النجمة أنغام حسمت الجدل والتساؤلات حول مصير حفلاتها الجديدة بعد العودة من الرحلة العلاجية الصعبة في الفترة الأخيرة، وأكدت استمرار خططها الفنية كما هي للفترة المقبلة، حيث تستعد لمواصلة نشاطها في الحفلات في الشهر المقبل، بعد قضائها أيام برفقة أسرتها وأصدقائها في الساحل الشمالي، من أجل التعافي من آثار رحلة العلاج الصعبة، وأكدت مصادر من الجهة المنظمة لحفلها المقبل لبرنامج "إي تي بالعربي" إن أنغام مصممة على إحياء الحفل وعدم تأجيله.
تفاصيل أول حفل لأنغام بعد أزمته الصحية
وكشفت أنغام موعد وتفاصيل عودتها إلى الحفلات بعد الأزمة الصحية، حيث أبقت على إعلان حفلها الجديد في لندن في يوم 23 سبتمبر المقبل، والذي تحييه في قاعة رويال ألبرت هول الملكية والعريقة في لندن، ومن المقرر أن تبدأ الفنانة أنغام استعدادات الحفل مع المايسترو هاني فرحات في الأيام الأولى من شهر سبتمبر بعد انتهاء فترة النقاهة، وهو ما يجعل حفلها حدثاً منتظراً للجمهور في الفترة المقبلة.
ولا تعتبر عودة أنغام إلى الحفلات حدثاً منتظرة لكونه اللقاء الأول لها مع الجمهور بعد ما يقارب شهر من تواجدها في المستشفى، ولكن لإحيائها الحفل على مسرح قاعة رويال ألبرت هول العريقة، وتحقق بذلك حدث مميز، بحسب ما ذكرته "بيلبورد عربية"، فإن حفل أنغام الجديد يشكل محطة استثنائية في مسيرتها، إذ تصبح أول فنانة مصرية تحيي حفلًا كاملًا في القاعة العريقة منذ أمسية عبد الحليم حافظ الشهيرة عام 1976، وبذلك تنضم إلى نخبة محدودة من الأسماء العربية التي اعتلت هذا المسرح، مثل كاظم الساهر وماجدة الرومي.
الصور من حسابات أنغام وأسرتها وأصدقائها على انستجرام
