حديث مؤثر من تامر حسني عن معاناته قبل ألبومه الجديد ويحتفل مع أسرة الراحل محمد رحيم

الفنان تامر حسني احتفل مؤخراً بطرح ألبومه الجديد "لينا ميعاد"، وتصدر الواجهة بأغاني الألبوم الجديد، واحتفل تامر حسني بطرح الألبوم الجديد بطريقة مؤثرة، ونشر رسالة للجمهور كشف من خلالها عن الرحلة الصعبة التي خاضها من أجل طرح الألبوم الجديد.

كواليس رحلة تامر حسني الصعبة في ألبومه الجديد

واحتفل الفنان تامر حسني بأصداء ألبومه الجديد "لينا ميعاد"، ونشر صورة تكشف تصدره التريند بأغنية "الذوق العالي" مع الفنان محمد منير، واستغل الصورة في الكشف عن الرحلة الشاقة التي خاضها لطرح ألبوم جديد يرضي به جمهوره، وقال في رسالته: "هنتهز الفرصة الجميلة دي إن أغنية الذوق العالي مع حبيبي اللي بموت فيه الـ King محمد منير تريند عام رقم واحد، وفي تريند الموسيقى لسه أول يوم أهوه، والـ ١٣ أغنية بتوع ألبوم لينا معاد في التريند".

وأضاف تامر حسني في رسالته: "عايز أقولكم حاجة، عشان كنت أوصل إن ألبومي يدخل التريند كله، وبعيداً عن التريند يعجبكم كده.. أنا مشيت مشوار كبير، أوله إني كنت بقرأ كل تعليقاتكم السلبية قبل الإيجابية، لأني عارف إنكم بتحبوني، وده خلاني أركز وأحلف جوا نفسي إني لازم أفرحكم وأخليكم فخورين بالمجهود اللي عملته..".

تامر حسني يحتفل بألبومه الجديد مع أبناء محمد رحيم

وتابع تامر حسني في رسالته المؤثرة حول الألبوم: "تاني حاجة، احترمت ذكرياتكم اللي على صوتي، وتعبت تعب مش طبيعي، ودخلت مستشفيات نص السنة ومش بحب أقول ولا أنزل أخبار من دي، يا جماعة أنا بحبكوا أوي، ومن يوم ظهوري وأنا واحد منكم، عارف إن في ألبومات مكانتش قد توقعاتكم، وإن في ألبومات علامات مش هتتنسي، هي دي الحياة، شوية كده وشوية كده، بس عارف مدى حبكم لألبوم عيش بشوقك، فكان جوايا تحدي واحد بس: إني أتحدى نفسي في عيش بشوقك وأتفوق عليه، فضلت إذاكر السوق الغنائي وتغير أنماط الموسيقى اللي أنا بحترمها كلها، وبحترم كل الفنانين اللي نجحوا فيها".

وتحدث تامر حسني عن استعدادته الخاصة للألبوم الجديد وقال: "فضلت أطور من أدائي، واذاكر جوا الاستوديو مع مهندسين صوت لمدة سنتين، وأجتهد مع الموزعين والملحنين والشعراء اللي بشتغل معاهم في تقديم أجدد شيء. ويمكن زعلوا مني كتير من كتر ما أنا عمال أغير وأعدل وأعيد من أول وجديد. بس دلوقتي فرحتي بالدنيا وهما بيشكروني قدامكم وعلى تليفوني من الإشادات اللي سامعنها منكم في حقهم، اشتغلت الألبوم ده وأنا جوايا عناد رهيب إن الألبوم كله يعجبكم، أكيد هيكون في تفاوت في الإعجاب، بس المهم إنكم قدرتوا مجهودي والتنوع اللي قدمته في الأوديو والڤيديو.. ".

واختتم تامر حسني رسالته حول الألبوم قائلاً: "متشكر من قلبي لكل حد نصحني، وكل حد نقدني عشان بيحبني، أنا سمعت كلامكم وتعبت أوي، وانتوا أكيد شايفين، تعبت عشانكم، وعشان برضو أحاول أكون واجهة فنية موسيقية جميلة لمصر، بحكم إني بسافر كتير أغني قصاد العالم، واسمي مطرب مصري عربي.. شكراً شركة TH، انتجتوا ألبوم كامل محترم.. شكراً صنّاع الألبوم عن ألبوم لينا معاد.. وكل الشكر ليكم يا أغلى الناس، ربنا يفرحكم زي ما انتوا مفرحني دلوقتي بكلامكم الجميل".

احتفالات مميزة من تامر حسني بألبومه "لينا ميعاد"

واحتفل أيضاً الفنان تامر حسني بألبومه الجديد برفقة الفنان محمد منير وكذلك أسرة الفنان الراحل محمد رحيم، وهي اللافتة التي لاقت تقدير الجمهور، ونشر تامر فيديو من الاحتفال وقال: "احتفالنا بأغنية الذوق العالي مع الKing محمد منير، وماس رحيم وهارتي رحيم أبناء الموسيقار العبقري الراحل محمد رحيم، الله يرحمه و يحسن إليه، والأستاذ المحترم أسامة رشدي، الذوق العالي.. كلمات تامر حسين، ألحان محمد رحيم، توزيع أحمد طارق يحيى"، ونشرت ماس ابنة الراحل محمد رحين رسالة قالت بها: "مبسوطة وفخورة اني كنت موجودة في اليوم الجميل دا، انا حسيت بيك يا بابا وشوفت فرحة الناس في عيونهم اللي دايما بتصنعها الحانك بس وزي ما قلتلك انك دايما بتكون معانا فى احلى أوقاتنا واصعبها بالحانك والحالات اللا متناهية اللي بتقدمها باستمرار".

واختتمت رسالتها قائلة: "الله يرحمك يا اغلى الناس على قلبي واجمل ما في الكون، وبحب اشكر تيمو الفنان العالمي صاحب الاحساس والاب الروحي، والكينج محمد منير اللي بحبه من كل قلبي واختي اللي بتشاركني مشواري وبتخلي الدنيا كلها اجمل والتفاصيل احلى لو هي بس فيها، الحمدلله دائماً وأبدا"، وجاءت هذه الاحتفالات بعدما طرح تامر حسني 15 أغنية في ألبومه الجديد "لينا ميعاد" والذي شهد العديد من المفاجآت ومنها دويتوهات مختلفة مع محمد منير والشامي وكريم أسامة وغيرهم، بالإضافة إلى تعاونه مع شركة "وارنر ميوزك" العالمية.

الصور من حساب تامر حسني على انستقرام.