الجميلة "بلية" تكشف 9 أسرار عن "عفاريت" عمرو دياب

 

هديل نشرت بوست من مقر إقامتها حاليا بمدينة سيدني الإسترالية قالت فيه: للناس الي لسة مهتمة وبتسالني دايما، دول 9 معلومات عن فيلم العفاريت مش ها تعرفهم غير من بلية، بيت عمرو دياب الي في الفيلم دا مش بيته ولا حاجة دا سويت في شيراتون الجزيرة، الفيلم اتصور في حوالي 6 شهور ما عدا مشهد واحد وتوقف التصوير تماما لمدة 7 شهور وبعدين اتصور المشهد، و دا كان مشهد ميال ميال في الاستاد".

 

أضافت: "اول مشهد اتصور في الفيلم لبلية كان اول مشهد لبلية مع الكتعة الي كان اوله قلم علي وشيي، وحفلة عمرو دياب في الفيلم كانت حفلة ليه بجد، و مشهد الشحاتة (الي بدون حوار) كانت الكاميرا مستخبية في عمارة و كنت بشحت بجد و لميت فلوس!!"

 

وقالت:  "المشهد بتاع "سرقة الخواجة كنتاكي" اتصور الساعة 3 صباحا ولوزة نامت في التصوير واضطريت احفظ كلامها في ساعتها والحوار تم كلة بيني وبين سقراط (لاحظ نومها في المشهد)، انا ما كنتش في الشوال لما سقراط شاله، دور بلية كان لبنت عمرها 8 سنوات و كان علي وشك اختيارها بالفعل و المخرج حسام الدين مصطفي لما شافني كنت اقل من 6 سنوات واخترني". 

 

واختتمت تدوينتها قائلة: "بمناسبة اني كنت 6 سنوات كنا بناكل في الاستراحة بين المشاهد وعمرو دياب قعد في الكرسي الي جمبي فقلتلة "ماما لازم تقعد جنبي علشان تأكلني". 

 

يذكر أن هديل شاركت بعد الفيلم في جزء من ملحمة ليالي الحلمية كما قدمت دور ابنة عادل إمام فى مشهد صغير ثم اعتزلت الفن وصارت طبيبة.